Hau’oli Lā Ho’iho’i Ea 2016 July 30-31 @ Thomas Square

Editorial by Na Laiana Wong
Star-Advertiser, July 30, 2016

Synopsis: This year’s ceremonies celebrating the restoration of sovereignty to the Kingdom of Hawai‘i in 1843 are being held today and tomorrow at Thomas Square. Come join in the commemoration of this landmark event.

‘Auhea ‘oukou e nā hoa ho‘omana‘o i kēia lā nui o ka mo‘olelo o Hawai‘i nei, ‘o ka Lā Ho‘iho‘i Ea.

E like nō me ka hana o kēlā me kēia makahiki, eia nō ke ho‘olaule‘a hou nei ka po‘e aloha ‘āina i kēia hopena pule, ‘o ia ho‘i ka lā 30 me 31 o Iulai.

He lā kēia nāna e ho‘olana mai i ka mana‘o o ka po‘e aloha ‘āina o Hawai‘i nei, no ka pakele ‘ana o ko kākou ‘āina i ka lima hao o ka mea nāna ia e me‘ome‘o mai ana. ‘O ia nō ‘o Lō Paulet, he kāpena moku no ke aupuni ‘o ‘Enelani, a ‘o ka HMS Carysfort ka inoa o ua moku nei.

‘O ia nō ka ho‘omaka ‘ana o ko Hawai‘i pale aku i kahi hana kā‘ili aupuni a ko waho. Eia nō kākou ke ho‘omaopopo nei i kēlā hana ‘ino ‘oiai kākou e ho‘omanawanui nei i ka noho hewa ‘ia e ‘Amelika Hui Pū ‘Ia. Ke lana nei ka mana‘o no ka hiki ‘ana mai o ka wā e ha‘alele ai kēia po‘e ho‘okolonaio. Aia ka pono ‘o ka waiho ‘ia mai o ko kākou ‘āina me ka maluhia. Eia nō ke māhuahua nei ka nui o ka po‘e aloha ‘āina a ke pa‘a nei ho‘i ko kākou mana‘o i ia mea he kū‘oko‘a. Ua maopopo na‘e, ‘a‘ole ia he noho kū‘oko‘a piha. Ua lilo ko kākou mau kino he pio na Maleka, a pēia ho‘i ko kākou ‘āina a me kā kākou ‘ōlelo. Eia na‘e, he noho kū‘oko‘a ia na ka no‘ono‘o. ‘A‘ole nō he wā e pau ai ka pono o ia mea he pono.

‘O ka Lā Kū‘oko‘a, he lā ia no kākou e ‘ākoakoa ai ma ka pāka i kapa ‘ia ma hope o ka inoa o ka ‘akimalala Thomas, kekahi ali‘i holo moku no ‘Enelani. Ma laila ana kākou e hō‘ike ai i ke kū‘oko‘a o ko kākou no‘ono‘o, ‘a‘ole ia he pio na ‘Enelani, na Maleka, a na wai hou akula. A no ke aha lā i kapa ‘ia ai ka inoa o ia pāka ma ka inoa o kēia ‘akimalala o ‘Enelani?

I ka makahiki 1843, ua holo mai kekahi ali‘i moku o ‘Enelani, ‘o ke kāpena Lō Paulet, no ka ho‘okolokolo ‘ana i ka hihia i kupu mai no kekahi ‘āpana ‘āina. ‘O ke kanikela o ‘Enelani e noho ana i Hawai‘i nei, ‘o Richard Charlton, ka mea e ho‘opi‘i ana. Ua ho‘ā‘o ua ‘o Lō Paulet e hui me Kamehameha III no ka ho‘oponopono ‘ana i kēia hihia. A no ka hiki ‘ole iā Kamehameha III ke hui me ia i ia manawa pono‘ī nō, ua ho‘ouna ‘o ia iā Gerrit P. Judd ma kona wahi. Ukiuki ihola kahi Paulet a ua ho‘oweliweli maila iā Kamehameha. No ia hana kohu ‘ole, ua pūlima ihola ‘o Kamehameha i kahi palapala ‘aelike e hā‘awi pio ana i nā ‘āina o Hawai‘i, a ua ka‘a akula ma lalo o ka mana o Paulet. Eia hou, ua ‘āke‘ake‘a ‘o Paulet i nā ala holo moku a pau e pae mai ai i Hawai‘i. Aia wale nō ka pae ‘ana a loa‘a kāna ‘ae.

He ‘elima mahina kona noho ‘ana i ka moku a hiki i ka hō‘ea ‘ana mai o ka ‘Akimalala Thomas i ka hopena o Iulai no ka hui ‘ana me Kamehameha III no ka ho‘oponopono ‘ana. I ka hopena, ua ho‘iho‘i ‘ia ke ea o Hawai‘i i ke aupuni Mō‘ī. ‘O kahi i huki hou ‘ia ai ka hae Hawai‘i i luna, ‘o ia ‘o ia ‘o Thomas Square i kēia wā. Ua mau nō ke ea o ka ‘āina i ka pono. E huliāmahi kākou i laila!

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: